പഴയ ഓണം

picture courtesy : google

പഴയൊരു തിരുവോണം,ഓർമ്മകൾ തിരിയിട്ട
പടിപ്പുരവാതിലിൽ വന്നെത്തി നോക്കി
തുമ്പയും തുമ്പിയും ഓണനിലാവുമാ-
പൂമുഖത്തെന്നെയും കാത്തു നിന്നു.

മഞ്ഞിൻ കണം നുണഞ്ഞാർദ്രയായ് മുക്കുറ്റി
എൻറെ പൂവാടിയിൽ നിന്ന കാലം
ഞാനുമെൻ അമ്മയും അമ്മുവും മുറ്റത്ത്
നിറമുള്ള പൂക്കളം തീർത്തിരുന്നു.

ഓണവില്ലീണമിട്ടോടി വന്നെൻറെയാ-
ഊഞ്ഞാലിലാടിക്കളിച്ചിരുന്നു
മാവേലിയൂട്ടിനായ് അമ്മയൊരുക്കിയ
ഇലയടക്കെന്തൊരു സ്വാദ്!

കറുകകൾ തളിരിട്ട ഒറ്റയാൾ പാത തൻ
അറ്റത്ത് നീന്നൊരു പിൻവിളി കേട്ടു ഞാൻ
എവിടെയോ തൊടിയിലൊരോണം പുലരുന്നു
പിന്നെയും കൊതി തീരെ നിന്നെയൂട്ടാൻ...